Zer da Hospitalitatea?

Urtero milioika pertsonak beren etxea utzi behar dute gerra, jazarpen politikoa, hondamendi naturalak, degradazio ekologikoa, bizitza aurrera atzeratzeko bitartekorik eza eta haien bizitza edo askatasuna arriskuan jartzen duten beste hainbat egoera direla eta.

Bigarren Mundu Gerraz geroztik inoiz iritsi den errefuxiatu kopuru handiena iristen ari da Europara gaur egun.

Errealitate horrek laguntzera deitzen digu eta hausnartzera behartzen gaitu: zer-nolako gaitasuna dugu harrera egiteko, sufrimenduarekin enpatizatzeko eta hainbesteko samina, desberdintasuna eta bidegabekeria sortzen dituzten kausak eragozteko?

Hospitalitate-kanpaina Jesusen Lagundiko Sektore Sozialeko erakundeek sustatzen dute; haren bidez, gure ezagutzak eta indarrak batu nahi ditugu, migratzaileei elkartasuna agertu eta barnean hartuko dituen kultura bat sustatzeko, haiekin batera. Ulermenean, laguntzan, babesean eta ongietorrian oinarritutako eremu bat sortu nahi dugu, abegia, lankidetza, eragina, sentsibilizazioa eta hezkuntza baliatuz.

Hospitalitate bideak 2020

Mundu osoan zehar hedatu den pandemiak ororen gainetik zuhurrak izatera behartzen gaitu, guztion osasuna eta ongizatea zaintzeko. COVID-19aren krisi sozial eta ekonomikoak bereziki kalteberatasun handiko egoeran dauden pertsonak kolpatzeko itxura du; besteak beste, lekualdatutakoak eta errefuxiatuak.

Horregatik, aurten, larrialdi betean gauden honetan, indarkeriatik eta pobreziatik ihesean eta etxetik urrun aurrera ateratzeko borrokan ari diren guztiak gogoratu nahi ditugu. Haien azalean jarri eta elkartasun-zubiak eraiki nahi ditugu: haien bidea gure bidea da.

Caminos de Hospitalidad - Participa

NOLA PARTE HARTU?

IBILTZEN JARRAITZERA GONBIDATZEN ZAITUZTEGU!

1. PARTEKATU IRUDIA SARE SOZIALETAN

Ekainaren 20tik aurrera, Errefuxiatuaren Nazioarteko Eguna denez, sare sozialetan (Facebook, Twitter edo Instagram) ibiltzeko oinetakoen argazki bat eta, horrekin batera, migratzaileen eta errefuxiatuen aldeko elkartasun-mezu bat partekatzera gonbidatzen zaituztegu.

1) Aukeratu hitz bat (nahi duzuna). Hemen aurki dezakezu inspirazioa.

2) Idatzi zure oinetakoetan edo paper batean.

3) Atera argazkia eta igo gure (eta zure) sare sozialetara #IbiltzenJarraitzenDugu hashtagarekin.

Egungo garai zailetan hospitalitate handiagoa eraikitzeko irudiak eta mezuak izango dira. Eskerrik asko zure mezua partekatzeagatik!

2. PANEL BIRTUALA: HOSPITALITATE-ESPERIENTZIAK PARTEKATZEN

2020ko ekainaren 23an (asteartea) 18:00etatik 19:00etara ALBOANen Youtubeko kanalean (www.alboan.tv) emango den web-mintegira gonbidatzen zaitugu.

Bertan, Mohammed Bouidek (Goazen programa, Bilbo), Ana Goikoetxeak (Loiolaetxeako erreferentziako familia, Donostia) eta Sergio Iturrek (Padre Lasa zentroa, Tutera) hartuko dute parte, eta Pau Vidal jesuitak hospitalitatearen espiritualitatearen gako batzuk emango dizkigu. Pauk Liberian, Kanian eta Hego Sudanen egin du lan errefuxiatuekin, eta gaur egun Migrastudium fundazioaren hospitalitate-proiektuan parte hartzen ari da.

Gainera, Euskadiko eta Nafarroako jesuiten gizarte-ekintzen ondoriozko zenbait hospitalitate-esperientziaren lekukotzen berri emango dugu.

 

Caminos de Hospitalidad 2019 - caminos

3. Uztailaren 5eko martxak

Konfinamenduaren ostean mugak badira ere, talde txikietan ibiltzeko baldintzak daudela uste dugu. Horregatik uztailaren 5ean, igandean, gehienez 15 laguneko taldeetan ibiltzeko gonbitea luzatzen dizugu. Bildu zure jendea, oinetako erosoak jantzi eta jarri martxan!

Hona hemen zuen hospitalitate bidaiak antolatzeko jarraibide batzuk!

Bete formulario hau zure martxari buruzko informazioarekin:

caminos de hospitalidad - información

Gure eskaerak

Giza eskubideak eta behartutako migratzaileen inklusioa bermatzeko neurriak ezar ditzatela eskatzen diegu ordezkari politikoei.

ERAGINA IZATEKO ESKAEREN DEKALOGOA

Abegizko eta inklusiozko gizartea eskatzeko ibiltzen jarraituko dugu. Tamalez, pandemia globalak migratzaileen eta errefuxiatuen kalteberatasun-egoera larritu dezake; baina, aldi berean, gobernu-erakundeek babes-sistemak indartu eta zabaldu ditzakete, eta giza eskubideak betetzen direla bermatu. 10 eskaera hauek egiten dizkiegu Europako ordezkari politikoei:

  1. Mugak zeharkatzen dituzten pertsonen bizitzak SALBATZEA eta haien eskubideak defendatzen dituzten pertsonak eta erakunde humanitarioak BABESTEA.
  2. Europar Batasunean asiloa eskatzeko eskubidea BERMATZEA eta errefuxiatu-esparruetan pilatutako pertsonak COVID-19 gaixotasunaren mehatxutik BABESTEA.
  3. Sartzeko eta bertan geratzeko bide seguruak eta legezkoak EZARTZEA eta birkokatzeko, bisa humanitarioak eskuratzeko eta familiak berrelkartzeko prozesuak SUSTATZEA.
  4. Errepresiozko migrazio-praktikei AMAIERA EMATEA: besteak beste, atxiloketei, barneratzeei eta migratzaileen itzularazte sumarioei, hala lurraldean nola lehorreko nahiz itsasoko mugetan.
  5. Iristen diren pertsonentzako harrera humanitarioko sistemak ZABALTZEA, baita nazioarteko babesa eskatzen dutenentzako harrera-sistemak ere, nahikoa toki dutela eta gutxieneko duintasun-baldintza batzuk betetzen direla bermatuz.
  6. Asiloari buruzko araudia Europako eta nazioarteko esparrura EGOKITZEA eta asiloari buruzko erregelamendu bat izatea prozedura modu espezifikoan garatzeko, eskatzaileen segurtasun juridikoa bermatuz.
  7. Integrazioa SUSTATZEA, kultura-aniztasunaren aberastasuna aintzat hartzen dituen bi norabideko prozesu gisa.
  8. Laguntza humanitarioa INDARTZEA, errenta nazional gordinaren % 0,7 garapenerako laguntza ofizialera bideratuz, eta hortik % 10, laguntza humanitariora.
  9. Bizileku- eta/edo lan-baimenak berritzeko eta lortzeko baldintzak eta prozedurak MALGUTZEA, bat-bateko irregulartasunari aurre egiteko eta gizarteratzea eta aukera-berdintasuna sustatzeko.
  10. Hospitalitate-kultura BULTZATZEA, tokian tokiko komunitateekin elkarlanean, hurbiltzearen aldeko jarrerak, kultura-aniztasuneko elkarbizitza eta herritartasun globalaren parte garen sentimendua sustatzeko.